Նկարչություն կտավի վրա Գոհարի հետ

Նկարչություն կտավի վրա Գոհարի հետ նկար

Նկարչության բացօթյա այս դասը ձեզ կներկայացնի Գոհար Պետրոսյանի ամենակարևոր ոգեշնչումը՝ իր հարազատ Հացիկ գյուղի մերձակայքում գտնվող բնապատկերները և մշակութային վայրերը: Դուք կսկսեք շրջել Գոհարի ստուդիայում, որտեղ կտեսնեք նրա խեցեգործական աշխատանքների օրինակները, կտավի վրա նկարները, և մարզի հնագիտական առարկաների նմուշները: Իր գեղարվեստական տեխնիկայի և անցած ճանապարհի մասին մի փոքր պատմելուց հետո, Գոհարը ձեզ կտանի դեպի այն վայրերից մեկը, որոնք դառնում են ոգեշնչում նրա ստեղծագործությունների համար` շրջակա գյուղեր, դաշտեր, տներ կամ հին եկեղեցիների ավերակներ․ սրանք ոգեշնչում կդառնան նաև ձեզ համար:

Կարող եք նաև այցելել Ծակ Քար ուխտատեղին․ բնական քարե հուշարձան, որը տեղի բնակիչները այցելում են հիմնականում հուլիսին՝ Վարդավառի տոնի առթիվ: Ըստ լեգենդի՝ նրանք, ովքեր անցնում են քարի միջով, բուժվում են բոլոր հիվանդություններից, և նրանց ցանկությունները իրականանում են։ Ծակ Քարից ոչ հեռու գտնվող լեռան վրա է գտնվում «Յոթ եղբայրների» մատուռը, որը մարտում նահատակված յոթ եղբայրների գերեզմանն է։ Կիրճը, որտեղ գտնվում են այս երկու վայրերը, հագեցած է տեղական ավանդույթներով և հավատալիքներով: Շատ այցելուներ տարածքում տեղադրում են խաչքարեր կամ տնկում ծառեր և ցանկություն պահում:

Հացիկի մոտ են գտնվում մի քանի հնագույն կրոնական վայրեր և առարկաներ։ Օրինակ` 1500-ական թվականներին թվագրվող ձեռագիրը հայկական մանրանկարչության հիանալի օրինակ է, որը, ըստ հավատալիքների, իր բուժիչ հատկությունների շնորհիվ պահպանվել է սերունդեսերունդ և ներկայումս պատկանում է Հացիկի 96-ամյա մի գյուղացու: Տեղացիների համար առանձնահատուկ նշանակություն ունի նաև գյուղի՝ 1988-ի երկրաշարժի ժամանակ մասամբ փլուզված բազիլիկան:

Դասի ավարտին Գոհարի ընտանիքն առաջարկում է սուրճ, թեյ և տեղական աղանդեր, ինչպիսիք են չորացրած մրգերը և խմորեղենները: Տան մեծ պարտեզում հանգստանալով՝ կարող եք տեղեկանալ Հացիկի պատմության և առօրյա կյանքի մասին կամ կարող եք ավելի շատ ժամանակ վայելել բնության գրկում:

Գոհարի՝ թանգարան հիշեցնող պատկերասրահում զբոսաշրջիկները կարող են մանրամասն ուսումնասիրել տարատեսակ գեղարվեստական ոճեր։ Այցի ընթացքում նրանք հաղորդակից կդառնան Հայաստանի հարուստ գեղարվեստական ավանդույթներին: Նրանց համար, ովքեր նախընտրում են մնալ Գոհարի ստուդիայում և պատրաստել սեփական հուշանվերը, Գոհարը նաև առաջարկում է խեցեղենի վրա նկարելու վարպետաց դասեր:

Photo by Narek Harutyunyan, My Armenia Program

Photo by Narek Harutyunyan, My Armenia Program

Photo by Narek Harutyunyan, My Armenia Program

Photo by Narek Harutyunyan, My Armenia Program

Photo by Narek Harutyunyan, My Armenia Program

Մոտակա փորձառություններ

Նմանատիպ փորձառություններ

Հետևեք նորություններին

Գրանցվեք այստեղ՝ տեղեկացված լինելու առաջիկա միջոցառումների և Հայաստանի մշակութային ժառանգության պահպանման ուղղությամբ տարվող մեր գործունեության մասին։