Ծղոտագործության դաս «Եղեգ»-ի հետ

Ավանդաբար ծղոտագործությունը եղել է Վայոց ձորի կարևոր արհեստներից մեկը։ Ինչպես և այսօր, Արփա գետի ափերը միշտ եղել են ծածկված ուռենիներով։ Այսօր ևս Արթուր Պետրոսյանը հյուսում է զամբյուղներ և այլ կենցաղային իրեր՝ փափկեցնելով և ճկելով Արփա գետի հովտում աճող ուռենու ճյուղերը։ Նրա ստեղծած իրերը կիրառելի են թե՛ առօրյայում, թե՛ տոնական միջոցառումների ժամանակ: Վարպետաց դասի ընթացքում Արթուրը ձեզ հետ կկիսվի իր հմտություններով։ Ծղոտագործության պատմությունը ներկայացնելուց հետո, նա ձեզ կսովորեցնի ինչպես գործել զամբյուղ, ափսե կամ գինու շշերի համար նախատեսված կաղապարներ։

Արթուրը ձեզ կտրամադրի կիսապատրաստի նմուշներ, որոնց հիման վրա դուք կարող եք ավարտին հասցնել ձեր նախընտրած առարկան տանը։ Այս զվարճալի և ինտերակտիվ վարպետաց դասը կարելի է անցկացնել տարածաշրջանի ցանկացած վայրում՝ հյուրանոցում, տեղական գինեգործարանում կամ այլ վայրում։